کراچی میں شدید گرمی کی لہر جاری۔ایک شخص ہلاک

شہر قائد میں ہیٹ ویو کے باعث شدید گرمی کی لہر جاری ہے جبکہ گرمی نے ایک شخص کی جان لے لی۔

نجی ٹی وی کے مطابق بلدیہ مدینہ کالونی 7 نمبر میں 30 سالہ نامعلوم شخص گرمی کے باعث پیدل چلتے ہوئے گر کر ہلاک ہوگیا۔

پولیس کے مطابق ہلاک شخص ہیٹ اسٹروک کا متاثر لگ رہا ہے۔ ہلاک ہونے والے شخص کو سول اسپتال منتقل کرکے اس کے ورثا کی تلاش شروع کردی گئی ہے۔

دوسری جانب محکمہ موسمیات کی جانب سے کراچی میں آج سے 3 دن کے لیے ہیٹ ویو الرٹ جاری کیا گیا ہے، ہیٹ ویو کے اثرات صبح سے ہی نظر آنا شروع ہوگئے ہیں، شہر میں سمندری ہوائیں بند ہونے اور نمی کا تناسب بڑھنے کے سبب شدید گرمی محسوس کی جارہی ہے۔

محکمہ موسمیات کا کہنا ہے کہ دن بھر لو کے تھپیڑے چلیں گے جب کہ درجہ حرارت 42 ڈگری تک جانے کا امکان ہے تاہم گرمی کی شدت 50 ڈگری کے برابر محسوس ہوگی۔

محکمہ موسمیات کا کہنا ہے کہ کراچی میں گرمی کی غیر معمولی لہر کی وجہ بحیرہ عرب میں بننے والا سمندری طوفان ہے، سمندری طوفان وائیو بھارتی گجرات کے ساحل سے ٹکراگیا۔

شدید گرمی کے پیش نظر طبی ماہرین نے شہریوں کو ہدایت کی ہے کہ دن کے وقت غیر ضروری طو پر گھروں سے باہر نکلنے سے گریز کریں، پانی اور ٹھنڈے مشروبات کا استعمال بڑھادیں اوراگر باہر نکلنا پڑے تو سر ڈھانپ کر یاسر پر گیلا کپڑا رکھ کر باہر نکلیں۔

تبصرے بند ہیں.