سرگودھا /کراچی /لاہور (امت نیوز)پاکستان کرکٹ ٹیم کے کپتان سرفراز احمد نے قوم سے اپیل کی ہے کہ وہ پاکستان کیلئے ووٹ ڈالیں اپنے علاقوں سے صاف ستھرے کردار کے حامل اور دیانت دار لوگوں کو ایوان میں لائیں۔سابق کپتان شاہد خان آفریدی نے قوم کے نام اپنے پیغام میں کہا کہ ووٹ ایک امانت ہے اس کا درست استعمال کریں اور اپنے ملک کے مسائل کو سامنے رکھتے ہوئے نیک اور صاف ستھری قیادت کو ووٹ دیں۔سابق کپتان محمد حفیظ نے کہا کہ اپنے قومی فرض کو ادا کرکے اس شخص کو ووٹ دیں جو پاکستان کے لیے بہتر ہو اور جو پارٹی پاکستان کے حق میں بہتر ہو اسے ووٹ دے کر کامیاب کریں۔ماضی کے عظیم کھلاڑی وسیم اکرم نے کہا کہ پاکستان کو بدلنے کا وقت آگیا ہے، تبدیلی کیلئے عمران خان کو ووٹ دیں۔ٹیسٹ اوپنر شعیب محمد نے کہا کہ تبدیلی کا وقت آگیا ہے لیکن سوچ سمجھ کر ووٹ دیں۔