کراچی(اسٹاف رپورٹر)قومی اسمبلی کے حلقہ 238 کے متعدد پولنگ اسٹیشنوں پر سیاسی جماعتوں کے کارکنان سیکورٹی اہلکاروں سے الجھتے دکھائی دیے۔ الیکشن کمیشن کی عائد کردہ پابندیوں کے نفاذ کی کوشش میں سیکورٹی پر تعینات پولیس و رینجرز اہلکاروں نے سیاسی جماعتوں کے کارکنوں کی سروں پر پہنی ہوئی پارٹی ٹوپیاں و انتخابی بیجز پولنگ اسٹیشن کے مین گیٹس پر جمع کئے۔ اس موقع پر کئی افراد کی سیکورٹی اہلکاروں سے تو تکار بھی ہوئی ۔پارٹی پرچم والی ٹوپیاں اوربیج اتروائے جانے کی وجہ سے کئی نظریاتی سیاسی کارکنوں نے ووٹ کاسٹ نہیں کئے۔بلال کالونی نمبر ایک کے پولنگ اسٹیشن نمبر 121کے پاس پی ٹی آئی کے کارکنوں نعمان اور ریاض نے بتایا کہ پابندی کی وجہ سے انہوں نے ووٹ نہیں ڈالے۔