کراچی(اسٹاف رپورٹر)عام انتخابات میں کامیابی حاصل کرنے کے بعد تحریک انصاف کے کارکنان کی بڑی تعداد جمعرات کی رات بھی شہر کے مختلف علاقوں میں ٹولیوں کی شکل میں نکل آئے اور شہر کی مختلف سڑکوں پر موٹر سائیکلیں اور کاریں لگا کر پارٹی کے ترانوں پر ناچتے رہے جس کی وجہ سے شہر کی اہم سڑکوں پر بدترین ٹریفک جام ہوگیا، ٹریفک جام میں مریضوں کو لے کر جانے والی ایمبولینسیں بھی پھنس گئیں۔تحریک انصاف کے کارکنانوں نے پٹیل پاڑہ،کشمیرروڈ،کریم آباد، فائیو اسٹار چورنگی سمیت دیگر سڑکوں پر کاریں اور موٹر سائیکلیں لگا کر سڑکیں بند کردیں جبکہ کاروں میں تحریک انصاف کے ترانوں پر ناچتے رہے۔ جس کے باعث سڑکوں پر گاڑیوں کی لمبی قطاریں لگ گئیں ، جبکہ ٹریفک کی روانی کو بحال کروانے کیلئے علاقائی پولیس یا ٹریفک پولیس کے اہلکار نظر نہیں آئے۔