کراچی (اسٹاف رپورٹر)مختلف حادثات و واقعات میں ماں بیٹے سمیت 6افراد جاں بحق ہوگئے جن میں سے ایک 30سالہ میمن گوٹھ میں ٹرالر کے نیچے آگیا جبکہ بلدیہ میں ایک خاتون پر گاڑی چڑھ دوڑی ۔ تفصیلات کے مطابق ہمدرد یونیورسٹی منگھوپیر کے قریب موٹر سائیکل پر سوار ماں بیٹے نامعلوم گاڑی کی ٹکر سے موقع پر جاں بحق ہوگئے ، متوفین کی شناخت 40سالہ غزالہ زوجہ خالد اور 20سالہ اسامہ ولد خالد کے نام سے ہوئی ، پولیس کے مطابق متوفیہ حب کے قریب کسی اسکول میں ٹیچر تھی اور اسکا بیٹا والدہ کو اسکول چھوڑنے اور لینے آتا تھا، متوفین نیوکراچی کے رہائشی تھے، بلدیہ رشیدہ آباد میں نامعلوم گاڑی کی ٹکر سے 30سالہ خاتون جاں بحق ہوگئی، متوفیہ کی شناخت ساجدہ زوجہ ممتاز کے نام سے ہوئی جوکہ بلدیہ کی رہائشی تھی، میمن گوٹھ کے علاقے لنک روڈ پر30سالہ نوشہروخان ولد افضل خان گاڑی کا ٹائر دھو رہا تھاکہ قریب سے گزرنے والے ٹرالر کے ٹائروں کے نیچے آکر جاں بحق ہوگیا، ماڑی پور کیماڑی ویسٹ ہارف کے قریب نامعلوم گاڑی کی ٹکر سے 40سالہ ویسرم ولد معراج موقع پر ہلاک ہوگیا، سرجانی ٹاؤن کے علاقے فور کے چورنگی سے متصل شاداب پرائڈ کے قریب زیر تعمیر عمارت پر کام کرنے کے دوران مزدور گرکر جاں بحق ہوگیا۔ متوفی کی شناخت31سالہ دلبر ولد عاشق کے نام سے ہوئی۔