کراچی (امت نیوز)پاکستان کرکٹ بورڈ کے ڈائریکٹر کرکٹ ہارون رشید کا تبادلہ کراچی کردیا گیا ہے ٗ امکان ہے کہ ڈائریکٹر کرکٹ آپریشنز کی خالی ہونے والی پوسٹ ذاکر خان کو مل جائے۔ نجی ٹی وی کے مطابق پاکستان کرکٹ بورڈ نے کراچی کے ہائی پرفارمنس میں ڈائریکٹر ساؤتھ کی نئی پوسٹ متعارف کرانے کا فیصلہ کیا ہے اور کراچی کی علاقائی کرکٹ اکیڈمی میں ڈائریکٹر ساؤتھ کی حیثیت سے سابق ٹیسٹ کرکٹر اور موجودہ ڈائریکٹر کرکٹ آپریشنز ہارون رشید کی تقرری کرنے کا فیصلہ کیا ہے۔ہارون رشید ماضی میں پی سی بی میں ڈائریکٹر گیم اینڈ ڈیولپمنٹ سمیت کئی عہدوں پر کام کر چکے ہیں اور یہ عہدہ ملنے کے بعد وہ دوبارہ اپنے آبائی شہر کراچی آجائیں گے ٗہارون رشید پی سی بی ہیڈ کوارٹر میں اہم ترین عہدے پر تعینات تھے تاہم انہوں نے کراچی آکر کام کرنے کی خواہش کا اظہار کیا ہے جس کے بعد جلد ان کا تبادلہ لاہور سے کراچی کردیا گیا ہے ٗاس سے قبل ماضی کے اسپنر اقبال قاسم کو کراچی میں ڈائریکٹر بنایا گیا تھا لیکن اقبال قاسم نے چند ماہ بعد نجم سیٹھی کی مشاورت کے بعد نیشنل بینک جوائن کرلیا تھا۔ اقبال قاسم کی جگہ قومی خواتین کرکٹ ٹیم کے منیجرعبدالرقیب کو پیشکش کی گئی تھی۔