کراچی (اسٹاف رپورٹر) مختلف علاقوں میں تیز رفتار گاڑیوں نے 3 افراد کو کچل دیا۔ ناظم آباد میں بچہ پانی کے ٹینک میں ڈوب گیا۔ سائٹ ایریا میں ایک شخص کرنٹ لگنے سے مارا گیا۔ تفصیلات کے مطابق ڈیفنس کے علاقے خیابان شہباز سگنل کے قریب جمعرات و جمعے کی درمیان شب تیز رفتار گاڑی کی زد میں آکر 30سالہ اویس ولد امان اللہ جاں بحق ہوگیا۔ منگھو پیر میں سڑک عبور کرنے کے دوران تیز رفتار گاڑی نے راہگیر 22سالہ علی ولد رفیق کو کچل ڈالا۔آئی آئی چندریگر روڈ پر جمعرات اور جمعے کی درمیانی شب نامعلوم گاڑی کی سے موٹر سائیکل سوار 25 سالہ علی حسن موقع پر جاں بحق ہوگیا۔ رضویہ کے علاقے ناظم آباد نمبر 2سیف اللہ ہوٹل کے عقب میں واقع گھر میں کھیل کے دوران 2 سالہ احمد ولد بھورا اچانک لاپتہ ہو گیا، جس کی محلے بھر میں تلاش شروع کردی گئی، تاہم 2گھنٹے بعد بچے کی لاش ٹینک میں تیرتی ہوئی مل گئی۔ سائٹ ایریا کے علاقے ولیکا اسپتال کے قریب واقع فیکٹری میں کام کے دوران کرنٹ لگنے سے26سالہ احمد خان ولد سلیمان ملوک ہلاک ہو گیا، متوفی خاموش کالونی گلبہار کا رہائشی تھا۔