کراچی (اسٹاف رپورٹر ) شہر کے مختلف علاقوں میں موٹرسائیکل ریس اور تیز رفتار گاڑیاں خاتون سمیت 4 افراد کی جان لے گئی، شاہ فیصل میں عمارت سے گر کر نوجوان جاں بحق ہو گیا۔ تفصیلات کے مطابق سہراب گوٹھ کے علاقے سپر ہائی وے الاصف اسکوائر کے سامنے تیز رفتار گاڑی کی زد میں آکر 40سالہ سلطانہ زوجہ شمیم حیدر شدید زخمی ہو گئی، جسے فوری عباسی اسپتال منتقل کیا گیا، جہاں اس نے دوران علاج دم توڑ دیا۔ پولیس نے بتایا کہ متوفیہ اسی علاقے کی رہائشی تھی۔ گڈاپ کے علاقے سپر ہائی وے ڈی ایچ اے سٹی کے سامنے موٹر سائیکل ریس کے دوران 2موٹر سائیکل ٹکرانے کے نتیجے میں 25سالہ زین ولد ظفر اقبال اور 27سالہ طارق ولد رحیم شیخ جاں بحق ہو گئے۔ پولیس نے بتایا کہ متوفی نارتھ ناظم آباد بلاک جے کے رہائشی تھے۔ منگھو پیر کے علاقے مائی گاڑی نادرن بائی پاس کے قریب ٹریفک حادثے میں 30سالہ سعید اللہ ولد زریں بخت موقع پر جاں بحق ہو گیا، متوفی منگھو پیر کا رہائشی تھا۔ شاہ فیصل کالونی میں رہائشی عمارت کی چھت سے پراسرار طور پر گر کر 25 سالہ محمد متین ولد مبین شدید زخمی ہو گیا، جسے فوری جناح اسپتال منتقل کیا گیا، جہاں اس نے زخموں کی تاب نہ لاتے ہوئے دم توڑ دیا۔ پولیس نے بتایا کہ واقعہ پراسرار ہے، جس کی تفتیش کی جارہی ہے۔