کراچی(اسٹاف رپورٹر) رینجرزاور پولیس نے مختلف علاقوں میں کارروائیوں کے دوران 33 ملزمان اور مشتبہ افراد کو گرفتارکرکے قبضے سے اسلحہ، منشیات ودیگر سامان برآمد کرلیا،کارروائیوں کے دوران 2 مغویہ بھی بازیاب کرائی گئیں۔ تفصیلات کے مطابق رینجرز نے شہر کے مختلف علاقوں ابراہیم حیدری، گڈاپ اورسول لائن کے علاقوں میں کارروائیوں کے دوران 4 ملزمان محمد اسلم عرف شمسو عالم، بابر خان، عیسی خان اور محمد حنیف عرف حنیفہ کو گرفتار کرکے ملزمان کے قبضے سے اسلحہ مسروقہ سامان اور منشیات برآمد کرلی۔ترجمان رینجرز کے مطابق ملزمان منشیات فروشی ،اسٹریٹ کرائم اور ڈکیتی کی متعدد وارداتوں میں ملوث ہیں۔ منگھو پیر پولیس نے دو ملزمان نوید اور رفیق کو گرفتارکرکے مغویہ نمرہ کو بازیاب کرلیا۔ کھو کھراپار پولیس نے سرجانی ٹاؤن سے اغوا ہونے والی لڑکی رابعہ کوبازیاب کر کے ملزم کو گرفتار کرلیا۔ چاکیواڑہ پولیس نے علاقے میں اسٹریٹ کریمنل امان اللہ اور منشیات فروش معراج کو،گڈاپ سٹی پولیس نے سپر ہائی وے پر 2ملزمان نصراللہ اور عیسی خان کو لانڈھی پولیس نے گٹکا مافیا کے 2کارندوں جبار اور فرحان کو گرفتار کر کے 18کلو گٹکا برآمد کرلیا۔عوامی کالونی پولیس نے منشیات فروش حسین کو گرفتار کر کے ایک کلو چرس برآمد کرلی ۔پیر آباد پولیس نے دو ملزمان حبیب الرحمن اور حیدر خان کوگرفتار کرکے قبضے سے ایک کلو سے زائد چرس برآمد کرلی۔ اورنگی ٹاؤن پولیس نے ملزم گل بہار کو گرفتارکرکے قبضے سے اسلحہ برآمد کرلیا۔شیر شاہ پولیس نے4ملزمان شاکر اللہ، مراد بخش، محمد زبیر اور ارشد عرف چینا کو گرفتار کرکے قبضے سے اسلحہ، نقدی ،موبائل فونز ودیگر سامان برآمد کرلیا۔ پاک کالونی پولیس نے گینگ وار کارندوں کی تلاش میں پرانا گولیمار میں سرچ آپریشن کرتے ہو ئے 10مشتبہ افراد کو حراست میں لے لیا۔