حب ( نمائندہ امت ) حب میں نامعلوم چور ایک ہی رات میں 5 دکانوں کے تالے توڑ کر ہزاروں روپے اور دیگر قیمتی سامان لے اڑے،جس سے تاجروں اورشہریوں میں خوف و ہراس پھیل گیا،پولیس گرفتاری میں ناکام ہوگئی۔ تفصیلات کے مطابق منگل اور بدھ کی درمیانی شب حب کے علاقے محمودی موڑ پر واقع مین روڈ پر نامعلوم چوروں نے پرچون اور پیٹرول کی دکان سمیت 5 دکانوں کا صفایا کر دیا، اور 40 ہزار نقدی اور چائے پتی وغیرہ سمیت دیگر قیمتی سامان لیکر فرار ہوگئے، جبکہ شہر کے مختلف علاقوں میں چوری ،ڈکیتی، اور رہزنی کی وارداتوں میں اضافے سے شہریوں میں خوف و ہراس پھیل گیا ہے۔ ذرائع کے مطابق ڈی آئی جی، ایس ایس پی لسبیلہ نوٹس لینے اور بہتر اقدامات اٹھانے سے گریزاں ہیں، یہی وجہ ہے کہ پولیس گشت نہ ہونے سے تالا توڑ گروپ ،سمیت دیگر جرائم پیشہ عناصر ایک بار پھر سرگرم ہوگئے ہیں۔