کراچی(اسٹاف رپورٹر)بلال کالونی پولیس نے 27جولائی کو بلال کالونی کے علاقے میں سگریٹ کمپنی کے ڈسٹری بیوٹر سے 28لاکھ روپے سے زائد رقم لوٹنے کے دوران ایک سیکورٹی گارڈ کو ہلاک اور ایک کو زخمی کرکے فرار ہونے والے3ملزمان کو گرفتار کرکے اسلحہ برآمد کرلیا۔ تفصیلات کے مطابق بلال کالونی انویسٹی گیشن پولیس نے 3ملزمان محمد کاشف خان، سہیل احمد عرف سنی اور شایان عرف شان کو گرفتار کرکے اسلحہ اور چھینی ہوئی موٹر سائیکل برآمد کرلی۔ایس ایس پی سینٹرل عرفان بلوچ نے پریس کانفرنس میں بتایا کہ گرفتار ملزمان کا 5رکنی گروپ ہے ، جس میں 2ملزمان آصف اور نوید بھی شامل ہیں۔ملزمان نے دوران تفتیش بتایا کہ انہوں نے 27جولائی بلال کالونی کے علاقے میں واقع گولڈ لیف کمپنی کے ڈسٹری بیوٹر آفس پر کارروائی کرتے ہوئے 28لاکھ 23ہزار 610روپے لوٹے تھے۔سیکورٹی گارڈ محمد ندیم اور محمد اقبال پر اندھا دھند فائرنگ کی تھی، جس کے نتیجے میں ایک گارڈ ہلاک اور دوسرا زخمی ہوا تھا۔ملزمان نے سیکورٹی گارڈز پر اس وقت فائرنگ کی تھی، جب وہ ڈسٹری بیوٹر آفس سے کیش لے کر نکل رہے تھے۔گرفتار ملزمان پہلے بھی کئی بار گرفتار ہوچکے ہیں۔