روم (امت نیوز) اٹلی میں گاڑیوں سے بھرا پل گر گیا جس سے 30 افراد ہلاک جبکہ متعدد زخمی ہوگئے ،پل کا100 میٹر کا حصہ مکمل زمیں بوس ہوگیا، 200 کارکن امدادی کارروائیوں میں مصروف ہیں ۔ تفصیلات کے مطابق اٹلی میں ایک پل گرگیا جس سے20 سے زائد گاڑیاں پے در پے نیچے ریلوے پٹریوں پر گرنے لگیں ، حادثے میں کم از کم 30افراد ہلاک جبکہ کئی زخمی ہوگئے ہیں وہیں ہلاکتوں میں اضافے کا خدشہ ظاہر کیا جارہاہے ۔حادثہ اٹلی کے شہر گینوا میں پیش آیا۔اطالوی پولیس کے مطابق اے 10موٹر وے کا 100میٹر کا حصہ تباہ ہو کر گر گیا جس سے 300فٹ گہرا گڑھا پیدا ہو گیا ۔ تاہم امدادی کارروائیاں جاری ہیں جن میں 200سے زائد امدادی کارکن حصہ لے رہے ہیں ۔ اٹلی کے وزیر ٹرانسپورٹ نے پُل گرنے کے واقعے کو سانحہ قرار دیا ہے۔