کراچی (اسٹاف رپورٹر) سرجانی ٹاؤن اور ماڈل کالونی میں مسلح ملزمان کی لوٹ مار ملزمان لاکھوں روپے مالیت کے10 جانورچھین کر فرار ہوگئے، ملیر جناح اسکوائر کے قریب لوٹ مار کرنے والے دو ملزمان عوام کے ہتھے چڑھ گئے، تشدد کے بعد پولیس کے حوالے کردیا گیا۔ تفصیلات کے مطابق سرجانی ٹاؤن کے علاقے ناردرن بائی پاس سے مسلح ملزمان قربانی کے جانوروں سے بھرا ٹرک اسلحے کے زور پر چھین کر فرار ہوگئے، مدعی سلیمان نے پولیس کو بتایا کہ اس کا تعلق سانگھڑ سے ہے اور زندگی بھر کی جمع پونجی کے 10جانور عید قرباں پر فروخت کے لیے کراچی لایا تھا اور ٹرک منڈی منتقل کررہا تھا کہ ملزمان نے ٹرک اور جانور دونوں چھین لیے ہیں اور فرارہوگئے ، چھینے جانے والے جانور لاکھوں روپے مالیت کے ہیں، تاہم پولیس نے واردات کا مقدمے درج کرلیا۔ علاوہ ازیں ماڈل کالونی میں خاتون اپنے دو بچوں کے ہمراہ پیدل جارہی تھی اسی اثناءمیں موٹرسائیکل سوار دو ملزمان آئے اور ایک ملزم نے اسلحے کے زور پر خاتون سے پرس چھینا اور اپنے ساتھی کے ہمراہ موٹرسائیکل پر فرار ہوگیا۔ ملیر کے علاقے جناح اسکوائر کے قریب 2ڈاکو اسلحے کے زور پر راہگیروں سے لوٹ مارمیں مصروف تھے کہ اسی اثناءمیں ملزمان نے نجی کمپنی کے سیلز مین کو بھی اسلحے کے زور پر روک کر لوٹ مار کی کوشش کی اس دوران ملزمان کو عوام نے پکڑ لیا اور تشدد کے بعد پولیس کے حوالے کردیا۔