لاڑکانہ/ نوڈیرو (نمائندگان) لاڑکانہ میں بھٹو اور کھوڑو برادریوں کا تصادم مزید 2 جانیں نگل گیا۔ کیٹی ممتاز کے کچے میں زمین کے تنازعہ پر فریقین میں گولیاں چل گئیں۔ اب تک 10 افراد لقمہ اجل بن چکے ہیں۔ تفصیلات کے مطابق لاڑکانہ کے علاقے نوڈیرو کے قریب کیٹی ممتاز تھانے کی حدود میں کچے کے علاقے میں بھٹو اور کھوڑو برادریوں کے2گروپوں کے درمیاں تصادم ہو گیا۔ اس دوران ہونے والی فائرنگ کے نتیجے میں2افراد علی نواز اور بگو خروس ہلاک ہوگئے۔ جن کی لاشیں کافی دیر تک جائے وقوعہ پر پڑی رہیں۔ اطلاع پر حد کے تھانے کی پولیس نے پہنچ کر مقتولین کی لاشوں کو پوسٹ مارٹم کے لیے نوڈیرو اسپتال پہنچا یا۔ پولیس کا کہنا ہے کہ واقعہ زمین کے تنازع کے باعث پیش آیا ہے ،تاہم فائرنگ کے بعد فرار ہونے والے ملزمان کے تعاقب میں پولیس پارٹی روانہ ہو چکی ہے ،جبکہ اب تک 10سے زائد افراد اس دشمنی کی نذر ہو چکے ہیں۔