کراچی (ایجنسیاں) پاکستان نیوی نے سی ویو پر ساحل کی صفائی کی مہم کا اہتمام کیا جس میں پاکستان نیوی کے افسران، جوانوں اور بحریہ کالجز کے طلباو طالبات نے شرکت کی ۔ مہم میں نیشن بلڈنگ انیشی ایٹو کے زیرِ انتظام مختلف شعبہ ہائے زندگی سے تعلق رکھنے والے افراد نے بھی شرکت کی۔ شرکانے سی ویو کے ساحل سے فاضل مواد خاص طور پر پلاسٹک کی اشیا، بوتلیں ، شاپر وغیرہ اٹھائے۔ اس مہم میں کھیل کے شعبے سے تعلق رکھنے والے ستاروں نے شرکت کرکے شرکاکی حوصلہ افزائی بھی کی۔ تقریب میں کمانڈر کراچی رئیر ایڈمرل آصف خالق نے اپنے خیالات کا اظہار کرتے ہوئے کہا کہ آلودگی کے منفی اثرات کی وجہ سے آبی حیات کو شدید خطرات لاحق ہیں ہمیں چاہیے کہ ماحول کو صاف ستھرا رکھنے کے لئے ساحلِ سمندر کو بھی ہر طرح کی آلودگی بالخصوص پلاسٹک کی اشیاسے محفوظ رکھیں اور زیادہ سے زیادہ شجر کاری کریں۔ ترجمان پاک بحریہ کے مطابق تقریب کے اختتام پر کمانڈر کراچی رئیر ایڈمرل آصف خالق نے نشان پاکستان پارک میں پودا بھی لگایا۔