کراچی(اسٹاف رپورٹر) ماڈل کالونی سے اغوا ہونے والا9 سالہ بچہ اغوا کاروں کے چنگل سے بھاگ نکلا، پولیس نے بچے کو والدین کے حوالے کرکے ملزمان کی تلاش شروع کردی ہے۔ تفصیلات کے مطابق گزشتہ روز ماڈل کالونی سے دو اغوا کاروں نے گھر کے باہر سے 9 سالہ نور مبارک کو اغوا کیا تھا، ایس ایچ او گڈاپ سٹی شاہ رخ نے بتایا کہ ملزمان نے 9سالہ بچے نور مبارک کو جمعہ کی شام 5بجے ماڈل کالونی کے علاقے میں واقع اس کے گھر کے باہر سے اغوا کرکے گڈاپ کے علاقے اٹھاکر لے گئے تھے، تاہم پولیس کو بچہ لاوارث حالت میں ملا جس پر بچے کو تھانے لاکر پوچھ گچھ کی گئی تو بچے نے بتایا کہ اسے گھر کے باہر سے دو ملزمان گاڑی میں بٹھاکر لے گئے تھے، ایس ایچ او نے مزید بتایاکہ پولیس بچے کی نشاندہی پر پولیس نے اغوا کاروں کے ٹھکانے پر کارروائی کی تھی تاہم کوئی گرفتاری عمل میں نہ آسکی۔