راولپنڈی(خبر ایجنسیاں) پاک فوج نے رواں برس 6 ستمبر کو یوم دفاع و شہدا منفرد انداز میں منانے کا اعلان کر رکھا ہے ۔ اس دن ایئرپورٹس ، شاپنگ مال، اسٹیشوں اور گاڑیوں پر شہدا کی تصاویر آویزاں کی جائیں گی۔عوامی نمائندے اور صحافی برادری شہدا کو یاد رکھیں۔ان کے گھروں پر جاکر شہیدوں کے لواحقین کا شکریہ ادا کیا جائے گا۔تعلیمی اداروں میں بھی تقریبات ہوں گی- ڈی جی آئی ایس پی آر میجر جنرل آصف غفور نے ٹوئٹر پر اپنے ویڈیو پیغام میں کہا کہ پاکستان کے ہر طبقے کے فرد نے پچھلے 70 سال میں بہت زیادہ قربانیاں دی ہیں، جن میں ایک ریڑھی والے سے لے کر مسلح افواج کے جوان اور دیگر افراد بھی شامل ہیں۔اس لیے اس مرتبہ یوم دفاع کو منفرد انداز سے منایا جائےگا۔ڈی جی کے مطابق 6 ستمبر کو میڈیا اور عوامی نمائندے ہر شہید کے گھر جائیں اور انہیں احساس دلائیں کہ آپ کے شوہر، بھائی، باپ، بیٹے نے قربانی دی۔اس طرح لوگوں میں احساس پیدا ہوگا۔انہوں نے کہا کہ اس دن کے حوالے سے مرکزی تقریب جنرل ہیڈ کوارٹرز (جی ایچ کیو) میں ہوگی، جسے براہ راست نشر کیا جائے گا۔