کراچی(اسٹاف رپورٹر)مختلف علاقوں میں فائرنگ سے ایک شخص جاں بحق اور ایک زخمی ہوگیا۔پولیس نے واقعات کو ڈکیتی مزاحمت کا شاخسانہ قرار دے دیا۔ تفصیلات کے مطابق بوٹ بیسن تھانے کی حدود مائی کلاچی روڈ سی لائن ٹریول ایجنسی جیسن اپارٹمنٹ کے قریب نامعلوم ملزمان نے کار پر فائرنگ کردی ، جس کے نتیجے میں کار سوار شخص جاں بحق ہوگیا۔ایس ایچ او شکیل شیروانی نے بتایا کہ اسپتال میں مقتول کی شناخت 50 سالہ گل زادہ ولد مہیب اللہ کے نام سے ہوئی ہے۔عینی شاہدین نے بتایا کہ گل زادہ موبائل پر بات کررہا تھا کہ اسی دوران 2 ملزمان نے آکر اسلحہ کے زور پر موبائل چھیننے کی کوشش کی، جس پر اس نے کار میں رکھی چھری سے ملزمان کو ڈرانے کی کوشش کی۔اسی دوران ملزمان فائرنگ کرکے فرار ہوگئے۔ادھر ڈاکس کے علاقے ماڑی پور روڈ آئی سی آئی چورنگی کے قریب ملزمان کی فائرنگ سے ایک شخص زخمی ہوگیا، جس کی شناخت 24 سالہ محمد عمران ولد عاشق حسین کے نام سے ہوئی ہے۔