کراچی(اسٹاف رپورٹر)کورنگی میں بدبخت بیٹے کی فائرنگ سے ماں سمیت 3افراد زخمی ہوگئے۔والدہ نے پسند کی شادی کی مخالفت کی تھی۔زخمیوں میں ملزم کا بھائی اور بھتیجی بھی شامل ہیں۔تفصیلات کے مطابق کورنگی کے علاقے کورنگی نمبر 3کبڈی گراؤنڈ سے متصل فرحت بنگلوز گلی نمبر 4مکان نمبر N-69 میں رہائش پذیر افتخار نے جمعرات کی علی الصبح جھگڑے کے دوران اپنی ماں اور بھائی پر فائرنگ کردی۔ فائرنگ کے نتیجے میں ماں، بھائی اور بھتیجی گولی لگنے سے زخمی ہوگئے۔ملزم افتخار موقع سے فرار ہوگیا۔پولیس نے پہنچ کر زخمیوں کو فوری طور پر قریبی اسپتال پہنچایا۔ایس ایچ او زبیر نواز نے ’’امت‘‘ کو بتایا کہ اسپتال میں زخمیوں کی شناخت 40سالہ طاہرہ زوجہ اکرم ، 18سالہ جاوید ولد اکرم اور 5سالہ آئینہ دختر محمد حسین کے نام سے ہوئی۔ان کا کہنا ہے کہ زخمی طاہرہ ملزم کی ماں اور جاوید ملزم کا چھوٹا بھائی، جبکہ آئینہ ملزم کی بھتیجی ہے۔پولیس کا کہنا ہے کہ ملزم افتخار پسند کی شادی کرنا چاہتا ہے، جس کی ماں نے مخالفت کی، تو ملزم فائرنگ کرکے فرار ہوگیا۔