کراچی (اسٹاف رپورٹر)سعدی ٹاؤن میں تالا توڑ گروپ کے کارندوں نے 2 موبائل شاپس کا صفایا کردیا۔ملزمان تالے توڑ کر لاکھوں روپے کی نقدی ، موبائل کارڈ اور دیگر سامان لے کر فرار ہونے میں کامیاب ہوگئے ۔ تفصیلات کے مطابق ملیر کینٹ کے علاقے سعدی ٹاؤن میں جمعہ اور ہفتے کی درمیانی شب موٹر سائیکل پر سوار تین ملزمان آئے اور این ایس کمیونیکشن اور آن لائن کمیونیکشن کے تالے کاٹنے کے بعد تین لاکھ روپے سے زائد نقدی اور لاکھوں روپے مالیت کے موبائل کارڈ لے کر با آسانی فرار ہونے میں کامیاب ہوگئے ، ملزمان کو واردات کرتے ہوئے سی سی ٹی وی فوٹیج میں دیکھا جاسکتا ہے جس میں ملزمان پرامن ماحول میں دکانوں کے تالے کاٹتے ہیں اور واردات کرنے کے بعد موٹر سائیکلوں پر بیٹھ کر فرار ہونے میں کامیاب ہوجاتے ہیں ، پولیس نے واقعہ کی درخواست وصول کرلی جبکہ سی سی ٹی وی فوٹیج میں ملزمان کے چہرے با آسانی شناخت کیے جاسکتے ہیں اس کے باوجود ملزمان کو گرفتار کرنے کیلئے عدم دلچسپی لے رہی ہے ۔