نئی دہلی (امت نیوز) دہلی کی جواہر لعل یونیورسٹی(جے این یو ) میں بی جے پی کی حامی طلبا تنظیم کی شکست پر دلچسپ تبصرے سامنے آئے ہیں اور ان میں بھارتی انتخابات میں دھاندلی کا بھی تذکرہ کیا گیا ہے ،سوشل میڈیا پر صارفین نے بی جے پی کے ملک میں الیکشن جیتنے کو ووٹر مشینوں کا کمال قرار دیا ہے۔جے این یو میں گذشتہ روز طلبا یونین کے انتخابات ہوئے جہاں بی جے پی کی طلبہ شاخ اے بی وی پی کو بائیں بازو کے اتحاد نے چاروں خانے چت کر دیا۔سوشل میڈیا پر صارفین نے قومی انتخابات میں دھاندلی سے اسے جوڑتے ہوئے طنز کیا کہاگر الیکٹرانک ووٹنگ مشین کا استعمال ہوتا تو جیت بی جے پی کی طلبا تنظیم کی ہی ہوتی ۔ ایک صارف نے کہا کہ وزیر اعظم مودی کی مہم کلین انڈیا کا آغاز جے این یو سے ہو گیا ہے۔ ان کا بظاہر اشارہ انڈیا کو بی جے پی اور ان کی اتحادی پارٹیوں سے پاک کرنے کی جانب تھا۔