کراچی(اسٹاف رپورٹر)تیز رفتار گاڑیوں کی ٹکر سے 6 نوجوانوں سمیت 7 افراد جاں بحق اور 2 افراد زخمی ہوگئے۔ تفصیلات کے مطابق مواچھ گوٹھ حب ریور روڈ پر گاڑی کی ٹکر سے موٹر سائیکل سوار 2 افراد شدید زخمی ہوگئے، جن میں سے ایک نے اسپتال میں دم توڑ دیا۔پولیس نے بتایا کہ متوفی کی شناخت 24سالہ سعید ولد یعقوب کے نام سے ہوئی جبکہ زخمی کی شناخت انصار ولد عبداللہ کے نام سے کی گئی۔ دونوں دوست تھے۔الاصف اسکوائر سپر ہائی وے پر سڑک عبور کرنے والے شخص کو تیز رفتار گاڑی نے کچل کر ہلاک کردیا۔متوفی کی شناخت 25سالہ خالد کے نام سے ہوئی۔طارق روڈ اللہ والی چورنگی پر ٹریفک حادثے میں 18سالہ شہباز ولد عبدالقیوم جاں بحق ہوگیا۔خواجہ اجمیر نگری کے علاقے سیکٹر بی 35 رحمانیہ موڑ کے قریب گاڑی کی ٹکر سے 75سالہ علی محمد ولد محمد حسین چل بسا۔ماڑی پور کے علاقے غلام عباس اسکول کے قریب ڈمپر نے موٹر سائیکل کو روند دیا، جس کے نتیجے میں 15 سالہ نوجوان جاں بحق اور دوسرا نوجوان 17 سالہ مہران ولد گل زیب زخمی ہوگیا۔منگھوپیر کے علاقے نورانی ہوٹل کے قریب ٹریفک حادثے میں 20سالہ دلبر ولد علی شیر چل بسا۔ماڑی پور کے علاقے نیو ٹرک اسٹینڈ حکیم کے اڈے کے قریب تیز رفتار گاڑی کی ٹکر سے موٹر سائیکل سوار 25 سالہ بابر علی ولد بشیر احمد بحق ہوگیا۔متوفی پنجاب کا رہائشی اور ٹرک اڈے پر مزدوری کرتا تھا۔