کراچی (اسٹاف رپورٹر) مختلف علاقوں میں تیز رفتار گاڑیوں نے 4افراد کو کچل ڈالا۔ کورنگی میں واٹر ٹینک میں گر کر معمر شخص جاں بحق ہوگیا۔ تفصیلات کے مطابق سائٹ ایریا غنی چورنگی کے قریب کار کی ٹکر سے 22سالہ نصراللہ جاں بحق ہوگیا۔ سعید آباد کے علاقے بلدیہ فٹبال گراؤنڈ کے قریب نامعلوم گاڑی کی ٹکر سے 60سالہ محمد افضل ولد میر افضل جاں بحق ہوگیا۔ پولیس کے مطابق متوفی بلدیہ کا رہائشی تھا۔ سپرہائی وے انصاری پل کے قریب گاڑی کی ٹکر سے 55سالہ ذوالفقار ولد صدیق جاں بحق ہوگیا۔ کلری کے علاقے ماڑی پور روڈ فٹبال گراؤنڈ کے قریب نامعلوم گاڑی کی ٹکر سے 60سالہ نامعلوم شخص جاں بحق ہوگیا۔ پولیس کا کہنا ہے کہ متوفی سے شناخت کی کوئی چیز نہیں ملی ہے۔ کورنگی صنعتی ایریا کے علاقے مہران ٹاؤن کا رہائشی 70سالہ رمضان گھر میں بنے زیر زمین پانی کے ٹینک میں گرکر جاں بحق ہوگیا۔ ایس ایچ او صابر خٹک نے امت کو بتایا کہ متوفی 13سال سے گھر میں اکیلا رہائش پذیر تھا اور رات کے اندھیرے میں ٹینک میں گرگیا، متوفی کے سر پر چوٹ کا نشان ہے۔ پولیس نے پوسٹ مارٹم کے بعد لاش سرد خانے منتقل کردی ہے ۔