کراچی (اسٹاف رپورٹر) قائد آبادمیں پولیس افسر کا گٹکا کارخانہ پکڑاگیا ۔پولیس نے چھاپہ مار کر بھاری مقدار میں گٹکا اور 2 مشینیں قبضے میں لے لیں ۔ آئی جی نے رپورٹ طلب کرلی ۔ تفصیلات کے مطابق قائد آباد پولیس نے گٹکافیکٹری پر چھاپہ مار کر بھاری مقدار میں تیار گٹکا اور 2مشینیں قبضے میں لے لیں۔ پولیس کے مطابق مذکورہ فیکٹری ریزرو پولیس کے انسپکٹر میر صمد کی ہے۔مذکورہ افسر باقاعدگی سے اپنی نگرانی میں گٹکا لوڈ کرواتا اور رقم وصول کرتا ہے۔ پولیس ذرائع کا کہنا ہے کہ مذکورہ کارخانے پر افسران بالا کے حکم پر چھاپہ مارا گیاہے مزید تحقیقات جاری ہیں ۔دریں اثنا آئی جی ڈاکٹر کلیم امام نے پولیس افسر کی مبینہ سرپرستی میں گٹکا تیاری اور فروخت سے متعلق میڈیا رپورٹس پر نوٹس لیتے ہوئے ڈی آئی جی شرقی سےرپورٹ فی الفور طلب کرلی ہے ۔انہوں نے ہدایت کی چھاپہ مار ٹیم کے بیانات کو سامنے رکھتے ہوئےغیرجانبدارانہ اور شفاف تحقیقات یقینی بناتے ہوئےملوث افراد کے خلاف ہرممکن اقدامات اٹھائے جائیں۔