کراچی(اسٹاف رپورٹر)قومی شاہراہ پر تیز رفتار اور آئل ٹینکر میں خوفناک تصادم ہوگیا،جس کے نتیجے میں خاتون سمیت 2 افراد جاں بحق اور 4 زخمی ہوگئے۔ حادثے میں کار مکمل تباہ جب کہ ٹینکر الٹنے سے تیل سڑک پر بہنے لگا اور ٹریفک کی روانی متاثر ہوگئی۔مائی کلاچی روڈ پر گاڑی نے موٹر سائیکل سوار کو کچل دیا۔تفصیلات کے مطابق اسٹیل ٹاؤن کے علاقے نیشنل ہائی وے شہباز پمپ کے قریب تیز رفتار کار اور آئل ٹینکر میں خوفناک تصادم ہوگیا، جس کے نتیجے میں کار مکمل طور پر تباہ اور ٹینکر الٹ گیا۔ ٹینکر سے تیل سڑک پر بہنے لگا۔اطلاع ملتے پولیس ، رینجرز اور امدادی ٹیم موقع پر پہنچ گئی اور سڑک کو بند کر کے کار میں موجود زخمیوں کو نکال کر جناح اسپتال منتقل کیا، جہاں پر دوران علاج زخموں کی تاب نہ لاتے ہوئے خاتون سمیت 2افراد نے دم توڑ دیا۔پولیس نے بتایا کہ متوفیہ کی شناخت 20سالہ کائنات اور جاں بحق شخص کی شناخت نہیں ہوسکی ، جب کہ زخمیوں میں 4افراد کی شناخت شازیہ ،رفیع اللہ، عمران اور اسلام الدین کے نام سے کی گئی۔دوسری جانب ٹریفک حادثے کے بعد قومی شاہراہ کے ایک ٹریک پر ٹریفک کی روانی معطل ہوگئی اور گاڑیوں کی قطاریں لگ گئیں۔ڈاکس کے علاقے مائی کلاچی روڈ پر گاڑی کی ٹکر سے موٹر سائیکل سوار نوجوان موقع پر جاں بحق ہوگیا۔پولیس نے بتایا کہ اسپتال میں متوفی کی شناخت 21سالہ حسن ظہیر ولد ظہیر احمد کے نام سے ہوئی ۔