اسلام آباد (امت نیوز) پاکستان سکواش فیڈریشن کے نائب صدر قمر زمان نے بھارت میں کھیلی گئی ایشیئن جونیئر انفرادی سکواش چیمپئن شپ میں قومی کھلاڑیوں کی شاندار کارکردگی کو سراہتے ہوئے کہا ہے کہ اس ایونٹ میں جونیئر کھلاڑیوں کے اعتماد میں اضافہ ہو گا اور ان کا مورال مزید بلند ہوا ہے۔ اتوار کو ’’میڈیا‘‘ سے گفتگو کرتے ہوئے انہوں نے کہا کہ ایونٹ میں قومی کھلاڑیوں کی کارکردگی شاندار رہی ہے۔ چیمپئن شپ میں پاکستانی جونیئر کھلاڑیوں نے تین طلائی اور ایک چاندی کا تمغہ حاصل کیا ہے۔ ایونٹ میں کھلاڑیوں کی عمدہ کارکردگی کا صلہ نہ صرف کھلاڑیوں کا بلکہ فیڈریشن کے عہدیداران کو بھی جاتا ہے۔ اسی طرح پاکستان سکواش فیڈریشن کے صدر ایئر چیف انور مجاہد کی بھی سکواش کے لئے گرانقدر خدمات ہیں۔