راولپنڈی(امت نیوز) پاکستان کی دو رکنی ٹیم ورلڈ بیچ ریسلنگ چیمپئن شپ میں شرکت کرے گی۔ محمد انعام بٹ ٹائٹل کا دفاع کریں گے۔ چیمپئن شپ 6 سے 7 اکتوبر تک ترکی میں کھیلی جائے گی۔ پاکستان ریسلنگ فیڈریشن کے سیکرٹری جنرل محمد ارشد ستار نے ’’میڈیا‘‘ کو بتایا کہ ورلڈ بیچ ریلسنگ چیمپئن شپ میں دو ریسلر سنیئر کیٹگری میں پاکستان کی نمائندگی کریں گے جن میں محمد انعام بٹ اور اسد بٹ شامل ہیں۔ انہوں نے بتایا کہ محمد انعام بٹ 90 کلو گرام اور اسد بٹ 70 کلو گرام کیٹگری میں حصہ لیں گے۔ محمد ارشد ستار نے بتایا کہ فیڈریشن نے اپنی مدد آپ کے تحت گوجرانوالہ میں تربیتی کیمپ کا انعقاد کیا ہے جہاں یہ دونوں ریسلر ایونٹ کیلئے تیاری کر رہے ہیں۔ انہوں نے کہا کہ محمد انعام بٹ اور عنایت اللہ اس سے قبل اسی چیمپئن شپ میں گولڈ میڈل جیت چکے ہیں۔ عنایت اللہ یوتھ اولمپک میں شرکت کی وجہ سے چیمپئن شپ میں حصہ نہیں لیں گے۔