کراچی(اسٹاف رپورٹر)پولیس مقابلوں کے دوران ایک ڈاکو ہلاک اور 4 زخمیوں سمیت 7 ڈکیت پکڑے گئے، جن میں سے ایک کی حالت تشویشناک ہے۔گارڈن شو مارکیٹ میں تالا توڑ گروہ کا کارندہ عوام نے پکڑ کر تشدد کے بعد پولیس کے حوالے کردیا۔ملزم کا 5 رکنی گروہ کچرا چننے کے بہانے وارداتیں کرتا ہے ۔دیگر علاقوں سے27 ملزم دھرلیے گئے۔تفصیلات کے مطابق حیدری تھانے کی حدود نارتھ ناظم آباد کے ڈی اے چورنگی سیفی اسپتال کے قریب پولیس نے موٹر سائیکل سوار 2 افراد کو رکنے کا اشارہ کیا، جس پر ملزمان نے پولیس پر فائرنگ کرتے ہوئے فرار ہونے کی کوشش کی، تاہم جوابی فائرنگ کے نتیجے میں دونوں ملزمان شدید زخمی ہوگئے ، جن میں سے ایک ہلاک ہوگیا، جب کہ دوسرے کو اسپتال میں طبی امداد دی جارہی ہے۔ملزمان کے قبضے سے اسلحہ، چھینی ہوئی موٹر سائیکل اور مسروقہ موبائل فونز برآمد ہوئے۔ایس ایچ او ارشد جنجوعہ نے بتایا کہ ملزمان واردات کرکے آرہے تھے کہ کے ڈی اے چورنگی پر چیکنگ پر مامور پولیس اہلکاروں سے سامنا ہوا۔گارڈن پولیس نے کارروائی کرکے 3 ملزمان تیمور، فراز اور رمیز کو گرفتار کرکے اسلحہ برآمد کرلیا،جبکہ ان کا ایک ساتھی عمران فرار ہوگیا۔پولیس کا کہنا ہے کہ گرفتار اور فرار ملزمان بچپن کے دوست اور اورنگی کے رہائشی ہیں۔انہوں نے کچھ سال پہلے اپنا ڈکیت گروپ بنایا تھا۔ 2 ملزمان بینک میں داخل ہوکر ٹوکن لے کر بیٹھ جاتے تھے ، جیسے کوئی شہری کیش لے کر نکلتا تھا۔وہ باہر موجود ساتھیوں کو اطلاع کردیتے تھے۔‘‘امت’’ کو ایس ایچ او انصر بٹ نے بتایا کہ علاقے میں تین چار وارداتوں کے بعد ملزمان کو گرفتار کرنے کیلئے بینکوں کے باہر سادہ لباس اہلکار تعینات کیے گئے تھے۔منگل کو جیسے ہی شہری بینک سے نکلا تو ملزمان نے تعاقب کے بعد لوٹنے کی کوشش کی۔اس دوران اہلکار بھی پہنچ گئے، جہاں فائرنگ کے تبادلے کے بعد 3 ملزمان کو گرفتار کرلیا،جبکہ ان کا ساتھی فرار ہوگیا۔ گارڈن کے علاقے شو مارکیٹ میں واقع موبائل دکان کے تالے کاٹ کر واردات کرنے والے ملزم جمعہ خان کو مکینوں نے پکڑنے کے بعد پولیس کے حوالے کردیا۔‘‘امت ’’کو ایس ایچ او انصر بٹ نے بتایا کہ ملزم کا پانچ رکنی ڈکیت گروپ ہے۔ملزمان کچرا چننے کے بہانے دن کے وقت علاقے میں گشت کرتے ہیں اور رات کے وقت کچرا چننے والا بورا اپنے ساتھ لاکر دکان کے باہر بورا رکھ کر لیٹ جاتے ہیں اور موقع دیکھ کر دکان کے تالے کاٹ کر سامان بوروں میں بھر کر فرار ہوجاتے ہیں۔ملزم جمعہ خان کچھ عرصہ پہلے جیل سے رہا ہوکر آیا ہے۔پاکستان بازار پولیس نے مقابلے کے بعد 2 زخمی ملزمان معین ، مقصود ، سرجانی ٹاؤن پولیس نے مقابلے کے بعد زخمی ملزم آصف ، ملیر سٹی پولیس نے 2 ملزمان مرتضی ، جاوید، پیر آباد پولیس نے ملزم فہیم ، اقبال مارکیٹ پولیس نے 2 ملزمان ثاقب ، کلیم ، ناظم آباد پولیس نے 2 ملزمان دانش ، بلال ، محمود آباد پولیس نے چنیسر گوٹھ سے منشیات فروش فرحان، مبینہ ٹاؤن پولیس نے 2 ملزمان حنیف ، عمران ، سعو د آباد پولیس نے منشیات فروش یاسر ، حیدری مارکیٹ پولیس نے 2منشیات فروشوں سرتاج خان ، شمیم احمد ، کلاکوٹ پولیس نے 8ملزمان جمشید،اکرم،تاج محمد،سراج احمد ،ایوب،عبدالرزاق،جاوید حسین ،ساجد بشیر ،کلفٹن پولیس نے 6 ملزمان عمران خان ،اشرف،عدیل،نعمان شاہ،گل شیراور صابر علی کو گرفتار کر کے اسلحہ و منشیات برآمد کرلی۔