کراچی (اسٹاف رپورٹر )سعید آباد پولیس ٹریننگ سینٹر سے متصل نجی اسکول میں گولی لگنے سے 8 سالہ اقصیٰ کی ہلاکت پر پولیس اہلکار کو گرفتار کر کے پستول برآمد کرلی گئی۔تفصیلات کے مطابق 28 ستمبر کو حب ریور روڈ پر واقع نجی اسکول میں کھیل کے دوران نامعلوم سمت سے آنے والی گولی لگنے سے اقصی شدید زخمی ہو گئی تھی جس نے 2روز جناح اسپتال میں زیر علاج رہنے کے بعد دم توڑ دیا تھا ۔اے ایس پی طارق نواز نے بتایا کہ درجنوں افراد کے بیانات لینے کے ساتھ بچی کو لگنے والی گولی کا فارنزک بھی کروایا۔ ٹھوس شواہد کی بنیاد پر گولی چلانے والے اہلکار ملزم وسیم کو گرفتار کر کے اسلحہ برآمد کرلیا جو اتحاد ٹاؤن تھانے میں تعینات ہے ۔ ملزم نے بیان میں کہا کہ اس کا گھر اسکول کی سامنے گلی میں ہے،میں اپنا اسلحہ صاف کر رہا تھا کہ گولی چل گئی ،ایس ایس پی ویسٹ 2انویسٹی گیشن عامر عباس نے بتایا کہ گرفتار اہلکار کے اسلحے کو فارنزک کیلئے بھیجا جائے گا ۔ علاقہ مکینوں کا کہناتھا کہ گولی گلی سے چلنے کی آواز آئی تھی، معلومات لینے پر ملزم وسیم ملوث پایا گیا ہے ۔