سرجانی میں مبینہ طور پر لڑکے کو اغوا کرنے کی کوشش ناکام

کراچی(اسٹاف رپورٹر)سرجانی ٹاؤن میں مبینہ طور پر لڑکے کو اغوا کرنے کی کوشش ناکام ہوگئی۔تفصیلات کے مطابق سرجانی ٹاؤن کے علاقے جیلانی ٹاون میں 15 سالہ لڑکے دانیال کو اغوا کرنے کے مبینہ کوشش ناکام ہوگئی ہے۔اطلاع پر پولیس نے پہنچ گئی۔لڑکے نے بتایا کہ اسکول سے واپسی پر ایک ہائی روف گاڑی میرے پیچھے آکر رکی۔گاڑی سے خاتون اتری اور مجھ سے اسکول کا پتا پوچھنے لگیں،پتہ بتانے کے بعد انہوںنے مجھے کہا گاڑی میں چل کر اسکول دیکھا دو،جس پر میں نے انکار کیا، تو خاتون نے زبردستی ہاتھ پکڑ کر گاڑی میں بٹھانے کی کوشش کی ،جس پر میں نے شور مچایا تو ایک موٹرسائیکل والا رک گیا،تاہم موٹرسائیکل سوار کو گاڑی میں موجود شخص نے اسلحہ دکھا کر جانے کا کہا۔بچے نے مزید کہا کہ میں نے خاتون کے ہاتھ پر کاٹا،جس پر اس نے میرا ہاتھ چھوڑ دیا اور میں گھر کی طرف بھاگ آیا۔خاتون کے پاس چھری تھی جس کے ذریعے انہوں نے مجھ کو ڈرایا تھا۔بچے کے والدین نے کہا کہ دانیا ل گھر آتے ہی بے ہوش ہوگیا تھا، جس پر ہم اس کو فوری قریبی اسپتال لے گئے، جہاں پر ہوش آنے کے بعد اس نے تمام صورتحال سے آگاہ کیا۔پولیس کا کہنا ہے کہ معاملہ پراسرار ہے ، تاہم تفتیش کے بعد اصل حقائق سامنے آئیں گے ۔