کراچی (اسٹاف رپورٹر) سمن آباد میں ڈمپر نے خاتون کو کچل دیا، حادثے کے بعد مشتعل علاقہ مکین سڑکوں پر آگئے، احتجاج کے باعث ٹریفک نظام درہم برہم ہو گیا۔ تفصیلات کے مطابق سمن آباد کے علاقے شارع پاکستان واٹر پمپ سے سہراب گوٹھ جانیوالے ٹریک پر واقع نجی اسپتال کے سامنے ایک خاتون نے ٹریفک کے دوران سڑک عبور کرنے کی کوشش کی تاہم پل سے اترنے والے ڈمپر نے خاتون کو کچل دیا اورفرار ہو گیا۔ حادثے کی اطلاع ملتے ہی امدادی ٹیم نے خاتون کو نازک حالت میں عباسی اسپتال منتقل کیا، جہاں اس نے دم توڑ دیا۔ ایس ایچ او افتخار احمد نے بتایا کہ متوفیہ کی شناخت نہیں کی جاسکی ہے۔ دوسری جانب حادثے کے بعد علاقہ مکین مشتعل ہوکر سڑکوں پر آگئے اور سڑک بند کرکے ٹائر نذر آتش کرتے ہوئے شدید ہنگامہ آرائی کی، جس سے ایک ٹریک پر ٹریفک معطل ہوگیا اور کئی کلومیٹر تک گاڑیوں کی لائن لگ گئی۔بعد ازاں پولیس نے مظاہرین کو منتشر کرکے سڑک ٹریفک کیلئے کھول دی۔