برج ٹائون(امت نیوز) جنوبی افریقہ ویمن نے ویسٹ انڈیز ویمن کو پانچویں اور آخری ٹی ٹونٹی انٹرنیشنل کرکٹ میچ میں 3 وکٹوں سے شکست دے کر سیریز 2-2 سے برابر کر دی، فاتح ٹیم نے 156 رنز کا ہدف آخری اوور کی پانچویں گیند پر 7 وکٹوں پر حاصل کیا، ہاولے میتھیوز کی 72 رنز کی جارحانہ اننگز رائیگاں گئی، لیزل لی میچ اور نتاشا میک لین سیریز کی بہترین کھلاڑی قرار پائیں۔ تاروبا میں کھیلے گئے پانچویں اور آخری ٹی ٹونٹی میچ میں ویسٹ انڈین ویمن ٹیم نے پہلے کھیلتے ہوئے مقررہ اوورز میں 5 وکٹوں پر 155 رنز بنائے، ہاولے میتھیوز نے جارحانہ بلے بازی کا مظاہرہ کرتے ہوئے 3 چھکوں اور 8 چوکوں کی مدد سے 72 رنز کی اننگز کھیلی، سمتھ نے 2 وکٹیں لیں۔