کراچی (اسٹاف رپورٹر ) رینجرز اور پولیس کارروائیوں کے دوران گینگ وار کمانڈر و کارندے سمیت 42 ملزمان کو گرفتار کرکے اسلحہ اور منشیات برآمد کرلی گئی۔ تفصیلات کے مطابق رینجرز اور پولیس نے چاکیواڑہ میں الگ الگ کارروائیاں کرکے ملزم عیسیٰ اور گینگ وار کمانڈر اصل بخش کو گرفتار کرکے 2 دستی بم اور دیگر اسلحہ برآمد کرلیا، عیسیٰ سہیل ڈاڈا گروپ کا کارندہ ہے، جو بھتہ خوری میں ملوث ہے۔ گلشن اقبال اور پی آئی بی کالونی میں رینجرز کارروائی کے دوران اسٹریٹ کرائم اور ڈکیتی میں ملوث 4 ملزمان یوسف، آصف، یعقوب اور عابد کو گرفتار کیا گیا، ملزمان سے اسلحہ اور دیگر مسروقہ سامان برآمد بھی ملا ہے۔ شاہ لطیف پولیس نے ملزم اسد اور گل نور کو گرفتار کرکے اسلحہ ،موبائل فونز اور مسروقہ موٹر سائیکل برآمد کرلی ہے۔ سپر مارکیٹ پولیس نے منشیات فروش ملزم رضوان عرف گڈو عرف اکبر بھورا کو گرفتار کر کے 250 گرام چرس برآمد کی ہے۔ اقبال مارکیٹ پولیس نے ملزم حسین اور اکبر کو مقابلے کے بعد زخمی حالت میں گرفتار کرلیا ہے، ملزمان سے 2 پستول اوردیگر سامان ملا ہے۔ بوٹ بیسن پولیس نے منشیات فروش ملزم سعد اللہ کو ایک کلو چرس سمیت گرفتار کرلیا۔ سی ٹی ڈی نے کارروائی کرتے ہوئے ملزم عبدالجبار کو گرفتار کرلیا ہے،ملزم مختلف وارداتوں میں مطلوب تھا۔ سہراب گوٹھ پولیس نے ملزم علی بابا اور بلال کو گرفتار کر لیا ہے، ملزمان لوٹ مار کی وارداتوں میں مطلوب تھے۔ سعید آباد پولیس نے 8جواری، سائٹ اے پولیس نے 2 ڈاکو حضرت اللہ اور عبدالرحمن، آرٹلری پولیس نے ملزم آفتاب، شیر دل اور سجاد ،جبکہ سولجر بازار پولیس نے منشیات فروش عثمان اور کامران کو گرفتار کرلیا۔ ملزمان سے ڈھائی کلو چرس ملی ہے۔ سپر مارکیٹ پولیس نے گٹکا فروش وقاص کو گرفتار کر کے بھاری مقدار میں مضر صحت گٹکا برآمد کر لیا۔ پی آئی کالونی پولیس نے ملزم آصف ،یعقوب اور عابد کو گرفتار کرلیاہے، اور ان سے پستول، ایم پی فائیو رائفل اور موبائل فونز برآمد کیا۔ بلوچ کالونی پولیس نے منشیات فروش رشید اور حبیب کو گرفتار کر کے 560گرام چرس برآمد کر لی ہے۔ سائٹ بی پولیس نے ملزم افضل خان اور جاوید کو گرفتار کرکے اسلحہ و دیگر سامان برآمد کرلیا ہے۔ پیر آباد پولیس نے اسٹریٹ کرمنل آصف اور ملزم شاہ زیب کو گرفتار کر کے بھاری مقدار میں مضر صحت گٹکا برآمد کر لیا۔ فریئر پولیس نے ملزم شیرعلی اور طارق کو گرفتار کرکے اسلحہ اور منشیات برآمد کرلی۔