اسلام آباد(امت نیوز) متحدہ عرب امارات میں پاکستان کے سفیر معظم احمد خان نے گزشتہ روز اپنی رہائش گاہ پر پاکستان کرکٹ ٹیم کے اعزاز میں عشائیہ دیا۔ پاکستانی سفیر نے قومی کرکٹ ٹیم کے کھلاڑیوں اور انتظامیہ کا خیر مقدم کرتے ہوئے آسٹریلیا کے خلاف پہلے ٹیسٹ میچ میں ٹیم سپرٹ اور پیشہ ورانہ مہارت کا مظاہرہ کرنے پر کھلاڑیوں کو مبارکباد دی۔ انہوں نے کہا کہ پوری قوم کی طرح پاکستانی سفارتخانہ اور متحدہ عرب امارات میں رہنے والے پاکستانی ٹیسٹ میچ میں قومی ٹیم کی کارکردگی کو سراہتی ہے۔ انہوں نے ملک سے باہر کرکٹ کے فروغ کے لئے پاکستان کرکٹ بورڈ کے کردار کو بھی سراہا اور ٹیم کے مستقبل کے لئے نیک خواہشات کا اظہار کیا۔ قومی کرکٹ ٹیم کے کپتان سرفراز احمد نے ٹیم کی حمایت اور کوششوں کے اعتراف پر پاکستانی سفیر کا شکریہ ادا کیا۔