کراچی (اسٹاف رپورٹر) کورنگی کے مختلف علاقوں میں کئی ماہ سے گیس بندش پر خواتین مشتعل ہو گئیں اور کورنگی تھانے کا گھیراؤ کرکے گیس کی فراہمی کا مطالبہ کیا۔ تفصیلات کے مطابق ایف ایریا، مصطفی تاج کالونی، چائنا پٹی سمیت کورنگی دیگر علاقوں میں 3 ماہ سے گیس فراہمی بند ہونے پر علاقے کی خواتین مشتعل ہوگئیں اور نعرے بازی کرتے ہوئے کورنگی تھانے پہنچ گئیں اور تھانے کا گھیراؤ کرکے احتجاج کیا اور گیس سپلائی کی فوری بحالی کا مطالبہ کیا۔ مظاہرین کا کہنا تھا کہ گیس نہ ہونے کی وجہ سے غریب علاقہ مکین ہوٹلوں سے کھانا خرید کر کھانے پر مجبور ہیں، جو اب برداشت سے باہر ہوتا جا رہا ہے۔ بعد ازاں پولیس کی یقین دہانی پر خواتین اپنے گھروں کو چلی گئیں۔