اسلام آباد(کرائم رپورٹر) شمس کالونی کے علاقے میں ٹرین کی ٹکر سے 2 سگے بھائیوں سمیت 3 بچے جاں بحق ہو گئے۔ تفصیلات کے مطابق اسلام آباد کے علاقے شمس کالونی میں تینوں بچے پٹڑی پر بیٹھے کھیل رہے تھے کہ ایک ٹرین آ گئی جس سے بچنے کیلئے دوسری پٹڑی کی طرف لپکے توعین اسی وقت اس لائن پر بھی ٹرین آگئی جس کےباعث وہ اپنےآپ کونہ بچاسکےجاں بحق ہونے والوں میں شعیب اور شہزاد سگے بھائی جبکہ ان کے ساتھ ایک تیسرا بچہ امجد شامل تھا جب کہ ایک بچے کا ذہنی توازن درست نہیں تھا۔ریسکیو حکام نے بچوں کی لاشیں پمز اسپتال منتقل کر دیں ہیں، مزید کارروائی کے بعد لاشیں ورثا کے حوالے کر دی جائیں گی۔ریسکیو ذرائع کے مطابق اسلام آباد کی شمس کالونی کے علاقے میں دو ٹرینوں کی کراسنگ کے دوران 3بچے ٹرینوں کی زد میں آ کر جاں بحق ہو گئے،ریسکیو ذرائع کا کہنا ہے کہ تینوں بچوں کی لاشیں پمز اسپتال منتقل کر دی گئی ہیں جب کہ جاں بحق ہونے والے بچوں میں دو سگے بھائی بھی شامل ہیں ذرائع کا مزید کہنا ہے کہ دو سگے بھائیوں کی لاشیں اٹک جبکہ ایک بچے کی لاش بھیرہ روانہ کر دی گئی ہے ۔