کراچی (اسٹاف رپورٹر )گدھا لکھنےپر سول ایوی ایشن اتھارٹی کے ڈائریکٹرسمیر سعید کیخلاف ہیڈ کوارٹر پر ملازمین نے شدید احتجاج کیااور شدید نعرے بازی کی ۔ایڈیشنل ڈائریکٹر جنرل نے تحقیقات کی یقین دہانی کرادی ۔تفصیلات کے مطابق ڈائریکٹرانجینئرنگ سمیر سعید کی جانب سے ملازمین کو گدھا لکھنے پرملازمین نے کام چھوڑ کرگذشتہ روزسی اے اے ہیڈ کوارٹرپر احتجاج کیا ۔مظاہرے سے خطاب میں ایمپلائز یونٹی (سی بی اے ) راؤ محمد اسلم نے کہا کہ سمیر سعید نے ملازمین کو نکما بےکار اور گدھا کہہ کر ملازمین کی عزت نفس مجروح کی ہے ۔انہوں نے نیو اسلام آباد انٹرنیشنل ائرپورٹ منصوبے پر قومی خزانے کو 100ارب روپے کا نقصان پہنچایا۔سمیر سعید جیسے افسران محکمے پر بوجھ ہیں ‘ملازمین کی محنت سے محکمہ ترقی کر رہا ہے۔ انہوں نے کہا کہ سمیر سعید فوری طور پر اپنے الفاظ واپس لیں ورنہ ملازمین کو روکنا مشکل ہوجائے گا ۔احتجاج کے دوران راؤ اسلم کو ایڈیشنل ڈی جی نے راؤاسلم کو اپنے دفتر بلالیا اور فوری طور پر احتجاج ختم کرنے کی ہدایت کی ‘اس دوران نئے چیف ایچ آر بھی احتجاج میں پہنچے اور مذکورہ معاملے کی تحقیقات کی یقین دہانی کرائی ۔