پاکستان ٹی ٹوئنٹی میں بہت مضبوط ٹیم ہے-گلین میکسویل

ابو ظہبی(امت نیوز)آسٹریلیا کے جارح مزاج بلے باز گلین میکسویل نے کہاہے کہ متحدہ عرب امارات میں پاکستان کے خلاف تین میچوں کی ٹی ٹوئنٹی سیریز کا بے تابی سے انتظار ہے ٗ امید ہے ہم اپنی کارکردگی میں ایک قدم بہتری لاسکیں ٗ ٹورنامنٹ جیتیں ۔ایک انٹرویومیں گلین میکسویل نے کہا کہ ہم اس چیلنج کیلئے پرعزم ہیں، ہم نے رواں سال کے آغاز میں پاکستان اور زمبابوے کے خلاف ٹی ٹوئنٹی سیریز کھیلی تھی لیکن فائنل میں پاکستان نے ہم سے بہتر کھیلا تھا۔انہوںنے کہا کہ امید ہے کہ ہم اپنی کارکردگی میں ایک قدم بہتری لاسکیں اور ٹورنامنٹ جیتیں۔انہوںنے کہاکہ پاکستان بالکل مضبوط ٹیم ہے اور انہوں نے عالمی نمبرایک بننے کے لیے چند برسوں میں بہت اچھی ٹی ٹوئنٹی کرکٹ کھیلی ہے۔آسٹریلوی بلے باز نے کہا کہ ہمیں اپنا کام مکمل کرنا پڑے گا، فخر زمان جیسا کھلاڑی بڑا شان دار ہے خاص کر زمبابوے کی سہ فریقی سیریز کے فائنل میں بہترین تھے۔پاکستانی بائولنگ کے حوالے سے بات کرتے ہوئے انہوں نے کہا کہ وہ کسی ایک بائولر پر انحصار نہیں کررہے ہیں بلکہ ایک متحد ہوکر ایک یونٹ کی طرح کھیلتے ہیں اس لیے ہمیں انہیں شکست دینے کیلئے بہترین کھیل پیش کرنا ہوگا۔