دبئی(امت نیوز) پاکستان اور آسٹریلیا کی کرکٹ ٹیموں کے درمیان تین بین الاقوامی ٹی ٹونٹی میچوں پر مشتمل سیریز کا دوسرا میچ (آج) جمعہ کو دبئی میں کھیلا جائیگا۔ پاکستان ٹیم کو آسٹریلیا کے خلاف تین میچوں کی سیریز میں 1-0 کی برتری حاصل ہے۔ پاکستان ٹیم نے پہلے ٹی ٹونٹی میچ میں کینگروز کو یکطرفہ مقابلے کے بعد 66 رنز سے شکست دے کر برتری حاصل کی۔واضح رہے کہ ٹی ٹونٹی فارمیٹ کی کرکٹ میں پاکستان کو آسٹریلیا پر برتری حاصل ہے۔ دونوں ٹیموں کے درمیان اب تک 18 میچز کھیلے گئے جن میں سے پاکستان نے 10 میچز اپنے نام کئے اور 7 میں آسٹریلوی ٹیم کامیاب رہی جبکہ ایک میچ ہار جیت کے فیصلے کے بغیر ہی ختم ہوگیا۔ پاکستان کرکٹ ٹیم کے قائد سرفراز احمد نے کہا کہ وہ آسٹریلیا کے خلاف پہلے ٹی ٹونٹی میں کامیابی پر بہت خوش ہیں۔ انہوں نے کہا کہ ٹیم نے اپنی کارکردگی کو برقرار رکھا تو ٹی ٹونٹی سیریز بھی اپنے نام کریں گے۔