کراچی(اسٹاف رپورٹر)لیاقت آباد کمرشل ایریا میں ڈاکو 3 دکانوں میں لوٹ مار کرکے فرار ہوگئے۔ ملزمان لاکھوں روپے لے اڑے، جبکہ کورنگی میں تالا توڑ گروہ نے 5 گوداموں کے تالے توڑے ، تاہم سامان بھاری ہونے کے باعث ناکام لوٹ گئے ۔تفصیلات کے مطابق لیاقت آباد کمرشل ایریا میں واقع مشہور رفیق کریانہ اسٹور پر جمعہ اور ہفتہ کی درمیانی شب 2 موٹر سائیکلوں پر سوار 5 نقاب پوش ملزمان اسلحہ کے زور پر رفیق کریانہ اسٹور اور اطراف میں واقع مزید 2 دکانوں سے اسلحہ کے زور پر لاکھوں روپے لوٹ کر فرار ہوگئے۔ذرائع کا کہنا ہے کہ ایک ملزم کے پاس کلاشنکوف اور 4 ملزمان کے پاس پستول تھی۔وہ کے پی کے رہائشی معلوم ہوتے تھے۔ویڈیو میں دیکھا جاسکتا ہے کہ کلاشنکوف بردار ملزم سڑک پر کھڑا ہے اور اس کے ساتھی دکان میں لوٹ مار کررہے ہیں۔ایس ایچ او لیاقت آباد راؤ شبیر کا کہنا ہے کہ ملزمان لوٹ مار کیے بغیر فرار ہوگئے تھے، کیونکہ گشت پر مامور پولیس پہنچنے پر ملزمان گھبرا کر بھاگ گئے۔کورنگی صنعتی ایریا کے علاقے مہران ٹاؤن میں تالا توڑ گروہ نے جمعہ و ہفتہ کی درمیانی شب 5گوداموں کے تالے توڑے، تاہم لوٹ مار کیے بغیر فرار ہوگئے۔ہفتہ کی صبح مالکان پہنچے ، جہاں تالے ٹوٹے ہوئے پائے۔ذرائع نے بتایا کہ گوداموں میں ٹائل کے ڈبے اور دیگر بھاری سامان موجود تھا، جو ملزمان لے کر نہیں گئے۔دوسری جانب ایس ایچ او صابر خٹک نے لاعلمی کا اظہار کرتے ہوئے کہا کہ اگر اس قسم کی کوئی واردات ہوئی ہے، تو شکایت درج کروائی جائے، جس کے بعد پولیس تفتیش کرے گی۔