لاڑکانہ(نمائندہ امت) چیئرمین پیپلز پارٹی بلاول بھٹو زرداری نے گڑھی خدا بخش بھٹو میں ذوالفقار علی بھٹو، بینظیر بھٹو و دیگر کے مزارات پر حاضری دے کر فاتح خوانی اور پھول نچھاور کیے۔ اس موقع پر پیپلزپارٹی سندھ کے صدر نثار کھوڑو سمیت دیگر رہنماءبھی موجود تھے جبکہ بلاول بھٹو زرداری کی آمد کے موقع پر مزار کو عام لوگوں کے لیے مکمل بند کرتے ہوئے سکیورٹی کے انتظامات انتہائی سخت کیے گئے تھے۔ دوسری جانب بلاول بھٹو زرداری نے نوڈیرو ہائوس میں کارکنان سے خوشگوار ماحول میں ملاقات کی۔ ملاقات میں پیپلزپارٹی سندھ کے صدر نثار کھوڑو، ایم این اے نصبیہ چنہ، ایم پی اے پروین بشیر قائمخانی سمیت دیگر بھی موجود تھے۔ اس دوران کارکنان نے چیئرمین پیپلزپارٹی کو اپنے مسائل سے آگاہ کیا اور درخواستیں بھی دیں جبکہ بلاول بھٹو زرداری نے بڑے غور کے ساتھ کارکنان کے مسائل سنے اور حل کی یقین دہانی بھی کروائی۔دریں اثنا سندھ رورل سپورٹ آرگنائزیشن کے افسران کی نوڈیرو بھٹو ہاؤس میں بلاول بھٹو زرداری کے ساتھ ملاقات کی۔ سرسو کے سی ای او ڈتل کلہوڑو نے سندھ بھر میں غریب خواتین کیلئے جاری فلاحی پروگرام پر بلاول بھٹو زرداری کو بریفنگ دی ۔ جب کہ بلاول بھٹو زرداری نے رکن سندھ اسمبلی فریال تالپور، پی پی پی سندھ کے صدر نثار احمد کھوڑو اور دیگر کے ہمراہ باقرانی تحصیل کے گائوں فرید آباد پہنچ کر ایم پی اے سہیل انور سیال کے والد کے انتقال پر تعزیت کی اور دکھ کا اظہار کیا۔