کراچی (اسٹاف رپورٹر) بن قاسم میں موٹرسائیکل پھسلنے سے نوجوان مارا گیا، جبکہ دیگر علاقوں میں گاڑیوں کی ٹکر سے نامعلوم خاتون سمیت 6افراد جاں بحق ہوگئے، ناظم آباد میں ڈھائی سالہ بچی چھت سے گرگئی، لیاری میں کرنٹ لگنے سے نوجوان جان سے ہاتھ دھو بیٹھا۔ تفصیلات کے مطابق بن قاسم کے علاقے پورٹ قاسم کے قریب تیز رفتار موٹر سائیکل سلپ ہونے سے موٹر سائیکل سوار 22 سالہ ارشد علی ولد اللہ رکھا جاں بحق ہوگیا،حادثہ تیز رفتاری کے باعث پیش آیا ہے۔ منگھوپیر نادرن بائی پاس ایم ٹی کٹ کے قریب نامعلوم گاڑی کی ٹکر سے موٹر سائیکل پر سوار 2افراد زخمی ہوگئے، جنہیں اسپتال پہنچایا گیا، جہاں دوران علاج 30سالہ ولی محمد ولد قادر بخش نے دم توڑ دیا جبکہ 20سالہ عبدالرزاق ولد یعقوب زیر علاج ہے۔ آگرہ تاج کالونی شنواری ہوٹل کے قریب نامعلوم گاڑی کی ٹکر سے 32سالہ مختیار جاں بحق ہو گیا۔ لیاقت آباد تین ہٹی پل کے قریب سڑک عبور کرنے والی نامعلوم 50سالہ خاتون کو تیز رفتار گاڑی نے کچل دیا روند دیا، جس کی لاش عباسی اسپتال لائی گئی۔ سعود آباد کے علاقے ملیر ہالٹ پل پر نامعلوم گاڑی کی ٹکر سے نامعلوم موٹر سائیکل سوار نوجوان جاں بحق ہو گیا، جس کی لاش جناح اسپتال لائی گئی۔ ناظم آباد نمبر ایک میں مکان کی چھت سے گر کر ڈھائی سالہ ہادیہ دختر اقبال موقع پر جاں بحق ہو گئی۔ لیاری نیا آباد میں گھر میں کام کے دوران کرنٹ لگنے سے 28سالہ رخسار احمد ولد محمد یونس جاں بحق ہو گیا۔