کراچی (اسٹاف رپورٹر)انٹر آرٹس پرائیویٹ سال دوم کے 10ہزار میں سے ساڑھے 6ہزار طلبہ و طالبات فیل ہو گئے ،کامیابی کا تناسب 36.25 فیصد رہا اس طرح تقریباً 64 فیصد طلبہ ناکام ٹھہرے۔ پہلی تینوں پوزیشنز طالبات لے گئیں جن میں سے بھی صرف ایک اے ون گریڈ حاصل کرسکی۔تفصیلات کے مطابق اعلیٰ ثانوی تعلیمی بورڈ کراچی نے انٹرمیڈیٹ سال دوم آرٹس پرائیویٹ کے سالانہ امتحانات برائے 2018کے نتائج کا اعلان کردیا ہے۔ نتائج بورڈ کی ویب سائٹ www.biek.edu.pk کے علاوہ ایس ایم ایس کے ذریعہ بھی معلوم کیے جاسکتے ہیں، طلبہ نتائج معلوم کرنے کیلئے BIEKلکھ کر spaceدیں پھر اپنا رول نمبر لکھیں اور 8583پر بھیج دیں۔ چیئرمین انٹربورڈ پروفیسر انعام احمد نے نتائج کا اعلان کرتے ہوئے بتایا کہ آرٹس پرائیویٹ کے سالانہ امتحانات برائے 2018ء میں تینوں پوزیشنیں طالبات نے حاصل کیں، ان امتحانات میں تابشہ وسیم بنت مرزا وسیم بیگ رول نمبر 451385نے 1100میں سے 878نمبرز اے ون گریڈ لے کر پہلی پوزیشن، سارہ خان ظفر بنت محمد ظفر خان رول نمبر 450478نے 845نمبرز اے گریڈ لے کر دوسری پوزیشن جبکہ خانیدہ ارشد بنت ارشد علی رول نمبر 450488 نے 843نمبرز اے گریڈ لے کر تیسری پوزیشن حاصل کی۔ ناظم امتحانات عظیم احمد نے نتائج کی تفصیلات بتاتے ہوئے کہا کہ آرٹس پرائیویٹ کے سالانہ امتحانات برائے 2018 میں 11032امیدواروں نے رجسٹریشن حاصل کی جبکہ10351امیدوارامتحانات میں شریک ہوئے جس میں سے 3752امیدوار کامیاب قرار پائے اس طرح کامیابی کا تناسب 36.25فیصد رہا۔کامیاب ہونے والے طلبہ میں سے ایک امیدوار اے ون گریڈ، 48اے گریڈ، 515بی گریڈ، 1441سی گریڈ، 1580ڈی گریڈ اور 167ای گریڈ میں کامیاب قرار پائے۔