اسلام آباد(مانیٹرنگ ڈیسک)مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے کہا ہے کہ این آر او پر لعنت بھیجتا ہوں۔قومی اسمبلی میں اظہار خیال کرتے ہوئے شہباز شریف نے کہا کہ عمران خان کو کیا خواب آیا تھا، خانقاہ میں پتہ چلا یا کسی پیر فقیر نے بتایا کہ میں نیلسن منڈیلا بننے کی کوشش کررہا ہوں، منڈیلا جھوٹ نہیں بولتا تھا اور یو ٹرن نہیں لیتا تھا، بڑھکیں اور دھمکیاں نہیں دیتا تھا، اگر حکومت الزامات ثابت نہ کرسکی تو معافی مانگے، وزیراعظم عمران خان کے ذاتی دوستوں کے نیب میں ریفرنس ہیں، انہوں نے اپنے دوستوں اور حواریوں کو این آر او دیا ہے۔شہباز شریف نے کہا کہ میری گردن کسی کے آگے نہ جھکے گی اور نہ کٹے گی بلکہ صرف پاکستان کے لیے کٹے گی، چیرمین نیب جسٹس (ر) جاوید اقبال کیوں ہیلی کاپٹر کیس میں ملزم عمران خان سے ملے، یہ تو ایسا ہے کہ وہ مجھ سے بھی حراست میں ملنے کےلیے آئیں، لیڈر آف اپوزیشن کی طرح لیڈر آف ہاؤس بھی ملزم ہیں، بلین ٹری منصوبہ ہو یا پشاور کا بی آر ٹی ہو، غیر قانونی بھرتیاں ہوئیں، 30ارب سے تخمینہ 80ارب پر چلا گیا، پشاور میں آج کھنڈرات بنے ہوئے ہیں، نیب نے اس کا کیا کیا۔رہنما ن لیگ نے کہا کہ حکومت اور نیب مل کر پوری قوم کو دھوکا دینا چاہتے ہیں، گزشتہ روز نیب تحقیقات کی ایک فہرست جاری کی گئی جس میں چاروں صوبوں کے لوگوں کے نام ہیں، یہ ڈھکوسلا ہے اور عوام کی آنکھوں میں دھول جھونکی جارہی ہے، میں این آر او پر لعنت بھیجتا ہوں، حکومت کو قیامت تک آس رہے گی کہ ہم این آر او کے لیے اس کے پاس جائیں گے۔دوران تقریر شہباز شریف کی زبان پھسل گئی اور وہ تحریک انصاف پر تنقید کے دوران غلطی سے کہہ بیٹھے کہ ہم پیپلز پارٹی کو ملک کا یہ خوبصورت پروگرام تباہ کرنے کی اجازت نہیں دیں گے۔ لیکن پھر وہ فورا ہی انہیں غلطی کا احساس ہوا تو انہوں نے معذرت کی، لیکن ان کی اس حرکت پر سارا ایوان قہقہوں سے گونج اٹھا ۔ اسپیکر اسد قیصر سمیت تمام ارکان اسمبلی کھلکھلا کر ہنس پڑے اور زوردار انداز میں کافی دیر تک ڈیسک بجاتے رہے۔شہباز شریف نے وزیر اطلاعات فواد چوہدری کو مناظرے کا چیلنج دیتے ہوئے کہا کہ ن لیگ کے دور میں لگے بجلی منصوبوں کو مہنگا ترین کہا گیا، 9 نومبر تک آزاد پاکستان میں ہوں مناظرہ کر لیں، اپنا حساب کتاب لے آئیں، آپ کا جھوٹ اور غلط بیانی ثابت کروں گا، پی ٹی آئی کو من مانی نہیں کرنے دیں گے ان کے راستے میں آہنی دیوار بنیں گے، بجلی کے منصوبے مہنگے ثابت ہوئے تو سیاست ہمیشہ کیلئے چھوڑ دوں گا۔