کراچی (اسٹاف رپورٹر)ویگو گروپ نے تاجر سمیت 2افراد اغواء کرلئے ۔دونوں واقعات میں سیاہ ویگو استعمال ہوئیں ۔ تفصیلات کے مطابق مدعی عامر شہزاد کلفٹن پولیس کو بتایا کہ وہ اپنے منیجر محمد بشیر کے ساتھ جا رہا تھا کہ سیاہ ویگو اور وٹز کارمیں سوار 7 ۔8 افراد نے روکا اور تلاشی کے بعدگاڑی کی چابی نکال کر پھینک دی اورمیرے منیجر محمد بشیر کو اغواءکر کےلے گئے۔ پولیس نےمقدمہ درج کرکے مغوی کی تلاش شروع کردی جبکہ گلستان جوہر میں بھی اسی طرح کا واقعہ رونما ہوا جس میں سیاہ رنگ کی ویگو ہی استعمال ہوئی۔ پولیس کے مطابق مدعی ندیم احمد خان نے گلستان جوہر تھانے میں درخواست میں دی کہ وہ عبدالجبار کے ساتھ منور چورنگی کی طرف جا رہے تھے کہ سیاہ رنگ کی ویگو میں سوار 4سے5 مسلح افراد نے انہیں روکا اور عبدالجبار کو اغواء کر کےلے گئے۔پولیس نے مقدمہ درج کرلیا، تاہم پولیس دونوں مغویوں کوبازیاب کرانے میں ناکام رہی ہے۔