کراچی (اسٹاف رپورٹر)بنارس پل کے اطراف میں پانی کی عدم فراہمی پر عوام نے عبداللہ کالج کے سامنے مین سڑک بند کردی ۔مظاہرین نے ٹائر نذر آتش کیے ، جس کے نتیجے میں بنارس پل کے اورنگی سے آنے والے ٹریک اور بنارس چوک و ملحقہ سڑکوں پر گاڑیوں کی قطاریں لگ گئیں اور بدترین ٹریفک جام ہوگیا۔پل کا دوسرا ٹریک بھی بند رکھا گیا۔ مظاہرین کا کہنا تھا کہ علاقوں کو کئی روز سے پانی فراہم نہیں کیا جارہا ، جس کے باعث قلت آب پیدا ہوگئی۔ محنت کش اور غریب عوام مہنگے داموں پانی خرید کر پینے پر مجبور ہوگئے۔احتجاج کے نتیجے میں ایک گھنٹہ ٹریفک معطل رہا۔بعد ازاں ٹریفک پولیس کے اہلکاروں نے مظاہرین کو پرامن طور پر منتشر کردیا۔