پولیس آپریشن میں منشیات فروشوں سمیت16ملزم گرفتار-اسلحہ و گٹکا برآمد

کراچی (اسٹاف رپورٹر) شہر کے مختلف علاقوں میں پولیس آپریشن کے دوران 16 ملزمان کو گرفتارکرکے ان سے اسلحہ، منشیات، مسروقہ موٹر سائیکل، گٹکا اور شراب کی بوتلیں برآمد کرلیں۔ تفصیلات کے مطابق فریئر پولیس نے ملزم مجاہد کو گرفتار کرکے اس سے چرس برآمد کرلی۔ سپرمارکیٹ پولیس نے ملزم وسیم احمد کو گرفتار کرکے اس سے بھاری مقدار میں گٹکا برآمد کرلیا۔ پاپوش نگر پولیس نے ملزم نعیم کو گرفتار کرکے اسکے قبضے سے اسلحہ برآمد کرلیا۔ کورنگی پولیس نے 3ملزمان حاکم علی ، سرمد علی اور گووندا کو گرفتار کرکے ان کے قبضے سے اسلحہ اور شراب کی بوتلیں برآمد کرلیں۔ سہراب گوٹھ پولیس کی 2الگ الگ کارروائیوں 2 ملزمان ثاقب و عبدالقدیر اور منشیات فروش نجیب اللہ پکڑے گئے، ملزمان کے قبضے سے اسلحہ اور آدھا کلو چرس ملی ہے۔ ڈاکس پولیس نے 2ملزمان شعیب اور منظور کو گرفتار کرکے ان سے منشیات برآمد کرلی۔ یوسف پلازہ پولیس نے منشیات فروش نعیم کو گرفتار کرکے اس سے منشیات برآمد کرلی، ملزم اس سے قبل بھی سپر مارکیٹ پولیس کے ہاتھوں گرفتار ہوچکا ہے۔ سائٹ سپر ہائی وے پولیس نے 2ملزمان فراز اور اجمل کو گرفتار کرکے انکے قبضے سے اسلحہ اور مسروقہ موٹر سائیکل برآمد کرلی۔ پاکستان بازار پولیس نے ملزم امان اللہ کو گرفتار کرکے منشیات برآمد کرلی۔ چاکیواڑہ پولیس نے اسٹریٹ کرمنل نذر خان کو گرفتار کرکے اسلحہ برآمد کرلیا۔