راولپنڈی میں نور خان ایئر بیس پر سی 130 طیارہ گر کر تباہ

راولپنڈی(آن لائن)راولپنڈی میں نور خان ائر بیس پر پاک فوج کا سی 130 طیارہ لینڈنگ کے دوران فنی خرابی کے باعث گر کر تباہ ہو گیا جبکہ حادثہ میں پائلٹ اور ٹرینی پائلٹ خوش قسمتی سے اپنی مہارت کا مظاہرہ کرتے ہوئے جان بچانے میں کامیاب ہو گئے اور معمولی نوعیت کے زخمی ہوئے۔تفصیلات کے مطابق جمعہ کے روز راولپنڈی ائر پورٹ سے ملحقہ نور خان ائر بیس پر ان دنوں ٹریننگ مشن جاری ہے تو اسی ضمن میں پاک فوج کا سی 130 طیارہ بھی ٹریننگ مشن کی پرواز کے بعد جونہی لینڈنگ کے لئے زمین پر اترنے لگا تو طیارے میں اچانک آگ بھڑک اٹھی اور طیارہ زمین کو چھوتے ہی زوردار دھماکے سے تباہ ہو گیا جبکہ طیارے میں سوار مکمل پائلٹ اور ٹرینی پائلٹ خوش قسمتی سے اپنی مہارت کا مظاہرہ کرتے ہوئے جان بچانے میں کامیاب ہو تے ہوئے معمولی نوعیت کے زخمی ہوئے۔ واقع کے بعد ریسکیو 1122 سمیت دیگر ادارے موقع پر پہنچ گئے اور طیارے کی آگ پر قابو پایا مگر بدقسمتی سے پاک فوج کا سی130 طیارہ جل کر مکمل خاکستر ہو گیا۔