نوجوان کو گلا کاٹ کر مارنے والا دوست گرفتار

کراچی(اسٹاف رپورٹر)کورنگی میں 13 اکتوبر کو گلا کٹی لاش ملی تھی، جس پر پولیس نے مقتول کے دیرینہ دوست کو گرفتار کرلیا۔ملزم نے مقتول سے ڈھائی لاکھ ادھار لیے تھے اور مانگنے پر اسے قتل کیا، جبکہ ملزم کا کہنا تھا کہ اس نے غیرت میں دوست کو قتل کیا۔پولیس نے موبائل ڈیٹا اور فوٹیج کی مدد سے گرفتار کیا۔تفصیلات کے مطابق کورنگی کے علاقے سے 13اکتوبر کو سیکٹر 35بی کورنگی نمبر چار سے رات کے وقت موٹر سائیکل کے قریب 24سالہ بلاول ولد محمد اکرم کی گلا کٹی لاش ملی تھی۔ پولیس نے واقعہ کا مقدمہ مقتول کے ماموں شاکر حبیب کی مدعیت میں درج کرلیا۔تفتیش کے دوران مقتول بلاول کے دوست کاشان کو حراست میں لیا، جس نے قتل کا اعتراف کیا۔ ‘‘امت ’’کو انویسٹی گیشن افسر ارشاد خان نے بتایا کہ مقتول اور ملزم بچپن کے دوست اور ایک ہی محلے کے رہائشی تھے۔ دونوں ایک ساتھ گھومتے، شاپنگ کرنے کے علاوہ کپڑے بھی ایک جیسے پہنتے تھے۔13اکتوبر کو بلاول گھر سے موٹر سائیکل لے کر نکلا اور کچھ ہی دیر بعد کچھ فاصلے پر اس کی گلا کٹی لاش ملی۔پولیس کا کہنا ہے کہ بلاول کا دوست کاشان عرف کاشی جنازے میں بھی شریک ہوا تھا اور اپنے دوست کے قتل میں دکھی دکھائی دیا، لیکن پولیس نے موبائل ڈیٹا اور سی سی ٹی وی فوٹیج حاصل کی، تو کاشان ہی قتل میں ملوث نکلا، جس نے دوران تفتیش بھی قتل کا اعتراف کرلیا۔مقتول بلاول کی والدہ شہناز نے ‘‘امت ’’کو بتایا کہ ملزم کاشان میرے بیٹوں کی طرح تھا۔کاشان کی ڈیڑھ سال قبل شادی ہوئی تھی۔شادی کے لیے اس نے میرے بیٹے بلاول سے ادھار رقم مانگی، جس پر میں نے بھی پاس رکھے پیسے دیئے۔اس طرح بلاول نے کاشان کو ڈھائی لاکھ روپے دیئے اور شادی میں پیش پیش رہا۔انہوں نے بتایا کہ میرے بیٹے بلاول کی 2ماہ بعد شادی تھی۔بلاول نے کاشان سے رقم مانگی ، تو دونوں میں معمولی تلخ کلامی بھی ہوئی۔کاشان نے رقم دینے سے انکار کیا اور مسلسل ٹال مٹول سے کام لیتا رہا۔ 13اکتوبر کو بلاول کسی کا فون آنے پر پیسے لانے کا کہہ کر گھر سے نکلا، جس کے بعد اس کی گلا کٹی لاش ملی۔مقتول کی والدہ نے مطالبہ کیا کہ جس طرح میرے بیٹے بلاول کو قتل کیا گیا۔اسی طرح کاشان کو بھی عبرتناک سزا دی جائے۔دوسری جانب ملزم کاشان نے دوران تفتیش انکشاف کیا کہ اس نے اپنے بھائی جیسے دوست بلاول کو غیرت کے نام پر قتل کیا۔میری ڈیڑھ سال قبل شادی ہوئی، تو بلاول نے میرے گھر آنا جانا زیادہ شروع کردیا۔ میری غیر موجودگی میں بھی وہ آتا تھا ، جب کہ میری بیوی بھی اس کے ساتھ اکثر فون پر باتیں کرنے لگی۔اس بات پر میرا اپنی بیوی سے جھگڑا ہوا۔میں نے اسے میکے بھیج کر بلاول کو قتل کیا۔تفتیشی افسر نے بتایا کہ ملزم نے واقعہ سے 3روز قبل گائے کاٹنے والی چھری خریدی تھی اور اپنے دوست کو بلا کر قتل کردیا۔