کراچی(اسٹاف رپورٹر)ویسٹ زون پولیس نے مختلف کارروائیوں میں ہزار سے زائد بوریوں میں بند 6 ہزار700 کلو چھالیہ برآمد کرلی، جسکی مالیت 5کروڑ سے زائد ہے۔ سائٹ ایریا سے اسمگل شدہ سامان برآمد کرکے 2 ملزمان کو بھی گرفتار کرلیا گیا۔ ایس ایس پی ویسٹ زون شوکت کھٹیان نے پریس کانفرنس میں بتایا کہ سائٹ بی پولیس نے خفیہ اطلاع پر حب ریور روڈ پر واقع گودام پر چھاپہ مار کر 2ٹرکوں میں لدی اسمگل شدہ چھالیہ کی 490 بوریاں برآمد کرلیں۔ انہوں نے مزید بتایا کہ سائٹ بی پولیس نے ہی دوسری کارروائی حب ریور روڈ پر دوسرے گودام میں کارروائی کرکے چھالیہ کی 590 بوریاں چھالیہ برآمد کرلیں۔ ایس ایس پی نے کہا کہ دونوں کارروائیوں میں مجموعی طور پر 6 ٹن 17من 20کلو چھالیہ پکڑی گئی ہے،جس کی مالیت 5کروڑ روپے سے زائد ہے۔ انہوں نے مزید کہا کہ تیسری کارروائی کے دوران سیمینس چورنگی کے قریب ٹرک کو قبضے میں لے کر 100بوریوں میں بند اسمگل شدہ سامان قبضے میں لیا گیا ہے، جبکہ 2 ملزمان جمال الدین اور وارث بھی پکڑے گئے ہیں، جنہیں کسٹم حکام کے حوالے کردیا ہے۔ ان کا کہنا تھا کہ مضر صحت چھالیہ گٹکے کی تیاری میں استعمال کی جانی تھی۔